கோவை விமான நிலையத்தில் செய்தியாளர்களைச் சந்தித்த அமைச்சர் கே.ஏ. செங்கோட்டையன், புதிய அரசின் செயல்பாடுகள், எதிர்க்கட்சிகளின் விமர்சனங்கள் மற்றும் பல்வேறு அரசியல் விவகாரங்கள் குறித்து விளக்கம் அளித்தார்.
அப்போது அவர் கூறுகையில், தமிழக முதலமைச்சரை தனிப்பட்ட முறையில் விமர்சிப்பது ஏற்றுக்கொள்ள முடியாதது என்றும், மாநிலத்திற்கு நேர்மையான மற்றும் வெளிப்படையான ஆட்சியை வழங்குவதே அரசின் முக்கிய நோக்கமாக இருப்பதாகவும் தெரிவித்தார். மக்கள் வழங்கிய தீர்ப்பின் காரணமாகவே திமுக இன்று எதிர்க்கட்சி வரிசையில் அமர்ந்திருப்பதாகக் கூறிய அவர், தேவையற்ற குற்றச்சாட்டுகளை முன்வைப்பதைத் தவிர்த்து ஆக்கபூர்வமான ஆலோசனைகளை வழங்கினால் மாநில வளர்ச்சிக்கு உதவியாக இருக்கும் என்றார்.
முதலமைச்சரின் பிறந்தநாள் நிகழ்வில் பள்ளி மாணவர்கள் கட்சிக்கொடியை ஏந்தி வந்தது குறித்த கேள்விக்கு பதிலளித்த அவர், அதில் எந்தத் தவறும் இல்லை என்றும், அது குழந்தைகளின் அன்பு மற்றும் உணர்வுப்பூர்வமான ஆதரவின் வெளிப்பாடாகவே பார்க்கப்பட வேண்டும் என்றும் கூறினார். மாணவர்களை யாரும் கட்டாயப்படுத்தவில்லை என்றும் விளக்கமளித்தார்.
தமிழ்த்தாய் வாழ்த்து விவகாரம் தொடர்பாக பேசிய அமைச்சர், அரசு நிகழ்ச்சிகளில் முதலில் தமிழ்த்தாய் வாழ்த்து இசைக்கப்பட்டு, நிகழ்ச்சி முடிவில் தேசிய கீதம் இசைக்கப்பட வேண்டும் என்ற நடைமுறை தெளிவாக அறிவுறுத்தப்பட்டுள்ளதாக தெரிவித்தார். மேலும், மாநில ஆளுநர் பதவிக்கும் உரிய மரியாதை வழங்கப்பட வேண்டும் என்றும், அந்தப் பதவியை விமர்சிப்பது சரியான அணுகுமுறை அல்ல என்றும் குறிப்பிட்டார்.
பருவமழை நிலவரம் குறித்து பேசிய அவர், இந்த ஆண்டு தென்மேற்கு பருவமழை குறைவாகவே உள்ளதாகவும், வடகிழக்கு பருவமழை காலத்தில் நிலைமை மேம்படும் என எதிர்பார்க்கப்படுவதாகவும் கூறினார். மேட்டூர் அணை திறப்பு குறித்து பரப்பப்படும் தகவல்களில் பல தவறுகள் உள்ளதாகவும், 200 மூட்டை நெல் மழையில் நனைந்ததாக கூறப்படுவது உண்மையல்ல; 20 மூட்டைகள் மட்டுமே பாதிக்கப்பட்டுள்ளதாகவும் தெரிவித்தார். பாதிக்கப்பட்ட நெல் மூட்டைகளை பாதுகாக்க உடனடி நடவடிக்கைகள் எடுக்கப்பட்டுள்ளதாகவும் அவர் கூறினார்.
புதிய அரசு பொறுப்பேற்று 45 நாட்களே ஆகியுள்ள நிலையில், அனைத்து துறைகளிலும் அமைச்சர்கள் தீவிரமாக பணியாற்றி வருவதாகக் கூறிய அமைச்சர், அரசின் செயல்பாடுகளை முழுமையாக மதிப்பிடுவதற்கு இன்னும் சில கால அவகாசம் தேவை என்றார். மேகதாது அணை விவகாரம் தொடர்பாகவும் சம்பந்தப்பட்ட அமைச்சர் ஏற்கனவே உரிய விளக்கத்தை வழங்கியுள்ளதாக தெரிவித்தார்.
அரசியல் விமர்சனங்கள் குறித்த கேள்விக்கு பதிலளித்த அவர், பாஜக மாநிலத் தலைவர் நயினார் நாகேந்திரன் முன்வைக்கும் கருத்துகளுக்கு பதிலளிக்க வேண்டிய அவசியம் இல்லை என்றும், திமுக மற்றும் பாஜக இடையேதான் ரகசிய அரசியல் புரிந்துணர்வு இருப்பதாக குற்றம்சாட்டினார். புதிய அரசு அமைந்த பிறகு பிரதமர், குடியரசுத் தலைவர் மற்றும் மத்திய அமைச்சர்களை சந்திப்பது வழக்கமான நடைமுறை என்றும், ஆட்சி அமைக்க யாரிடமும் உதவி கோரவில்லை என்றும் தெரிவித்தார்.
மேலும், முந்தைய ஆட்சியாளர்கள் 100 நாட்களில் நடவடிக்கை எடுப்பதாக கூறி ஐந்து ஆண்டுகள் பல வாக்குறுதிகளை நிறைவேற்றவில்லை என்றும், தற்போதைய அரசு தவறுகளை அனுமதிக்காது என்றும் அவர் கூறினார். “நாங்கள் தவறு செய்ய மாட்டோம்; அதே நேரத்தில் தவறு செய்தவர்கள் யாராக இருந்தாலும், எந்த உயர்ந்த பதவியில் இருந்தாலும், அவர்கள் மீது பாரபட்சமின்றி கடுமையான நடவடிக்கை எடுக்கப்படும்” என அமைச்சர் செங்கோட்டையன் உறுதிபட தெரிவித்தார்.