நாடாளுமன்ற மக்களவையில் 2021-22 ஆம் ஆண்டுக்கான பொருளாதார ஆய்வறிக்கையை மத்திய நிதியமைச்சர் நிர்மலா சீதாராமன் தாக்கல் செய்துள்ளார். மேலும் இந்த ஆய்வறிக்கை என்ன , இதில் என்ன என்ன சிறப்பம்சங்கள் உள்ளன என்பது குறித்து பார்க்கலாம்.
பொருளாதார ஆய்வறிக்கை என்றால் என்ன?
இந்தியப் பொருளாதாரத்தின் தற்போதைய நிலை, அதன் சமீபத்திய செயல்பாடுகள், அடுத்து வரும் காலத்தில் அது எவ்வாறு இருக்கும், பொருளாதார வளர்ச்சியை மேம்படுத்துவது எப்படி உள்ளிட்ட தரவுகளையும், விளக்கங்களையும், திட்டங்களையும் கொண்ட ஒரு விரிவான ஆவணமாகும்.
இதை யார் வெளியிடுவார்?
மத்திய நிதியமைச்சகம் தரப்பிலிருந்து ஒவ்வொரு ஆண்டும் இந்த அறிக்கை வெளியிடப்படும். இந்திய அரசின் தலைமைப் பொருளாதார ஆலோசகர்தான் இந்த அறிக்கையை தயார் செய்வார். ஆனால் இந்த ஆண்டுக்கான அறிக்கை நிதித் துறை நிபுணர்கள் மற்றும் மூத்த அதிகாரிகளால் தயார் செய்யப்பட்டுள்ளது.
அதன் வரலாறு என்ன?
1950-51ஆம் ஆண்டு முதல் இந்தப் பொருளாதார ஆய்வறிக்கை அரசு தரப்பிலிருந்து வெளியிடப்பட்டு வருகிறது. தொடக்கத்தில் பட்ஜெட் தாக்கல் செய்யப்படும் அதே நாளில்தான் பொருளாதார ஆய்வறிக்கையும் தாக்கல் செய்யப்பட்டு வந்தது. இந்த நடைமுறை 1964ஆம் ஆண்டு வரை இருந்தது. அதன் பின்னர் பட்ஜெட் தாக்கலுக்கு முதல் நாளில் இந்த அறிக்கை தாக்கல் செய்யப்படுகிறது.
எப்போது வெளியாகும்?
மேலே கூறியது போல, ஒவ்வொரு நிதியாண்டுக்கான மத்திய பட்ஜெட் தாக்கல் செய்யப்படும் நாளைக்கு முந்தைய நாளில் இந்த பொருளாதார ஆய்வறிக்கை நாடாளுமன்றத்தில் தாக்கல் செய்யப்படும். பிப்ரவரி 1ஆம் தேதியில் பட்ஜெட் தாக்கல் செய்யப்படுவதால், அதற்கு முந்தைய நாளான ஜனவரி 31ஆம் தேதியில் பொருளாதார ஆய்வறிக்கை வெளியாகும்.
