தனியார் சட்டக் கல்லூரிகளுக்கு மாவட்டங்களின் தேவையின் அடிப்படையில் அனுமதி வழங்கப்பட்டு வருவதாகவும், திமுக முன்னாள் அமைச்சர்கள் மீதான வழக்குகளில் சட்டப்படி நடவடிக்கை எடுக்கப்படும் என்றும் அமைச்சர் நிர்மல்குமார் தெரிவித்தார்.
கோவையில் நடைபெற்ற தனியார் சட்டக் கல்லூரி திறப்பு விழாவில் கலந்து கொண்ட அமைச்சர் நிர்மல்குமார், பின்னர் செய்தியாளர்களைச் சந்தித்துப் பேசினார்.தனியார் சட்டக் கல்லூரிகளுக்கு அனுமதி அப்போது, தனியார் சட்டக் கல்லூரிகளுக்கு அனுமதி வழங்குவது தொடர்பான கேள்விக்கு பதிலளித்த அவர், அம்பேத்கர் சட்டப் பல்கலைக்கழகத்தின் கீழ் செயல்படும் சட்டக் கல்லூரிகள் இல்லாத மாவட்டங்களில் தேவையின் அடிப்படையில் புதிய கல்லூரிகளுக்கு அனுமதி வழங்கப்படுவதாகத் தெரிவித்தார்.
சில கல்லூரிகள் அனுமதி விதிமுறைகளை மீறிச் செயல்பட்டதால், கடந்த ஆண்டு மூன்று கல்லூரிகளின் விண்ணப்பங்கள் மற்றும் மாணவர் சேர்க்கை நிறுத்தி வைக்கப்பட்டதாகவும் அவர் கூறினார்.
திமுக மீது ஊழல் குற்றச்சாட்டுகள்
தொடர்ந்து பேசிய அமைச்சர், பள்ளி மாணவர்களின் பாதுகாப்புச் சான்றிதழ்களை வழங்குவதில் முறைகேடுகள் நடைபெற்றதாக திமுக அரசின் மீது குற்றம்சாட்டினார். ஆயிரக்கணக்கான பள்ளிகளிடம் மிரட்டி பணம் வசூலிக்கப்பட்டதாகவும், குழந்தைகளின் பாதுகாப்பு தொடர்பான சான்றிதழ்களைப் பயன்படுத்தி பெருமளவில் பணம் வசூலித்ததாகவும் அவர் குற்றம்சாட்டினார்.
மேலும், அமைச்சர் கே.என். நேரு தொடர்புடைய துறையில் சுமார் 2,500 பேருக்கு வேலைவாய்ப்பு வழங்கியதில் முறைகேடுகள் நடைபெற்றதாகவும், ஒருவருக்கு ரூ.20 லட்சம் முதல் ரூ.30 லட்சம் வரை வசூலிக்கப்பட்டதாகவும், இதன் மூலம் ரூ.800 கோடிக்கும் அதிகமாகப் பணம் வசூலிக்கப்பட்டதாகவும் அவர் தெரிவித்தார்.இந்த விவகாரம் தொடர்பாக வழக்குகள் பதிவு செய்யப்பட்டுள்ளதாகவும், நீதிமன்றத் தடையால் விசாரணை தொடங்குவதில் தாமதம் ஏற்பட்டதாகவும் கூறிய அவர், தற்போது தடை நீக்கப்பட்டுள்ளதால் சட்ட விதிமுறைகளுக்கு உட்பட்டு விசாரணை நடைபெறும் என்றார்.
ஆதாரங்கள் இருந்தால் பழைய வழக்குகளிலும் நடவடிக்கை மக்களின் வரிப்பணம் மற்றும் சொத்துக்கள் முறைகேடாகப் பயன்படுத்தப்பட்டதற்கான ஆதாரங்கள் இருந்தால், அந்தத் தவறு 10 ஆண்டுகளுக்கு முன்பு, 15 ஆண்டுகளுக்கு முன்பு அல்லது 20 ஆண்டுகளுக்கு முன்பு நடைபெற்றிருந்தாலும் வழக்குப் பதிவு செய்யப்படும் என்று அமைச்சர் தெரிவித்தார்.
சட்டம் ஒழுங்கு விவகாரத்தில் சமரசம் இல்லை
தமிழகத்தில் சட்டம் ஒழுங்கு பிரச்சினைகள் குறித்த கேள்விக்குப் பதிலளித்த அமைச்சர், கொலை உள்ளிட்ட குற்றச் சம்பவங்கள் தொடர்பாக காவல்துறையினர் தீவிரமாக விசாரணை மேற்கொண்டு வருவதாகக் கூறினார்.குற்றச் சம்பவங்களில் தொடர்புடையவர்கள் யாராக இருந்தாலும் நடவடிக்கை எடுக்கப்படும் என்றும், புகார்கள் மீது உரிய நடைமுறைகளைப் பின்பற்றி முதல் தகவல் அறிக்கைகள் பதிவு செய்யப்படுவதாகவும் தெரிவித்தார். சட்டத்தின் முன் யாரும் தப்பிக்க முடியாது என்றும், குற்றச்செயல்களை மூடி மறைக்கவோ, விசாரணையில் சமரசம் செய்யவோ அரசு தயாராக இல்லை என்றும் கூறினார்.சிறையிலிருந்து தப்பிய கைதிகளைத் தேடும் பணி தீவிரம்
சேலத்தில் சிறையிலிருந்து 17 கைதிகள் தப்பிய சம்பவம் குறித்த கேள்விக்கு பதிலளித்த அமைச்சர், இதுவரை ஐந்து பேர் கைது செய்யப்பட்டுள்ளதாகத் தெரிவித்தார். தப்பியோடிய மற்ற கைதிகளைப் பிடிக்கத் தேடுதல் வேட்டை தீவிரப்படுத்தப்பட்டுள்ளதாகவும் கூறினார்.இந்தச் சம்பவத்தில் அலட்சியமாகச் செயல்பட்டதாகக் கருதப்படும் சிறைத்துறை காவலர்கள் சிலர் பணியிடை நீக்கம் செய்யப்பட்டுள்ளதாகவும், பாதுகாப்புக் குறைபாடுகள் குறித்து ஆய்வு செய்து கூடுதல் நடவடிக்கைகள் எடுக்கப்படும் என்றும் அவர் தெரிவித்தார்.
முன்னாள் அமைச்சர்கள் கைது தொடருமா?
திமுக முன்னாள் அமைச்சர்கள் மீதான கைது நடவடிக்கைகள் தொடருமா என்ற கேள்விக்கு பதிலளித்த அமைச்சர், யாரையும் பழிவாங்கும் நோக்கத்தில் அரசு நடவடிக்கை எடுக்கவில்லை என்றார்.பள்ளிகளிடம் மிரட்டி பணம் வசூலித்ததாகக் கூறப்படும் விவகாரத்தில், ஆயிரக்கணக்கான பள்ளிகள் பாதிக்கப்பட்டுள்ளதாகவும், புகார்களின் அடிப்படையில் முறையான விசாரணை நடத்தப்பட வேண்டும் என்றும் தெரிவித்தார்.இந்த வழக்கில் காவலில் எடுத்து விசாரிக்க நீதிமன்றம் உத்தரவிட்டுள்ளதாகக் குறிப்பிட்ட அவர், நீதிமன்ற உத்தரவுகளுக்கு உட்பட்டு நடவடிக்கைகள் மேற்கொள்ளப்பட்டு வருவதாகக் கூறினார்.மேலும், தவறு செய்தவர்கள் மீது மட்டுமே சட்டப்படி நடவடிக்கை எடுக்கப்படும் என்றும், அரசியல் பழிவாங்கும் நோக்கம் அரசுக்கு இல்லை என்றும் அமைச்சர் நிர்மல்குமார் தெரிவித்தார்.