கவர்னர் மாளிகை செலவுகள் பட்டியல் !

சித்திரை முதல் நாளுக்காக தேநீர் விருந்துக்கு அழைப்பு விடுத்தார் ஆளுநர் ரவி. நீட் உள்ளிட்ட தீர்மானங்களை கிடப்பில் போட்டிருக்கும் ஆளுநருக்கு எதிர்ப்பு தெரிவிக்கும் வகையில் திமுக மற்றும் அதன் கூட்டணி கட்சிகள் இந்த விருந்தை புறக்கணித்தன. பாஜக அதிமுக, பாமக கட்சிகள் மட்டுமே கலந்துகொண்டன. ஆளுநரின் தேநீர் விருந்தை தமிழக அரசு புறக்கணித்ததும் தமிழக பாஜக தலைவர் அண்ணாமலை, “ஆளுநருக்கு டீ செலவு மிச்சம். மக்கள் வரிப்பணம் கொஞ்சம் மிச்சமாகிறது’’ என்றார்.

“பெட்ரோல், டீசல் விற்கும் விலையில் ஆளுநர் மாளிகைக்குச் சென்றுவர ஆகும் டீசல் செலவு மிச்சம் என எங்களாலும் சொல்ல முடியும். தமிழ் நாட்டின் உரிமை பிரச்சனைக்கான புறக்கணிப்பைத் தேநீர் செலவு மிச்சம் என மலினப்படுத்தக்கூடாது” என்று பதிலடி கொடுத்தார் விடுதலை சிறுத்தைகள் கட்சி சட்டமன்ற உறுப்பினர் ஆளூர் ஷாநாவஸ்.

நிதி அமைச்சர் பிடிஆர் பழனிவேல் தியாகராஜன், “இன்னொரு அம்சத்தையும் குறிப்பிட மறந்து விடாதீர்கள், ஆளூர் ஷாநாவஸ் சகோதரரே. இந்த தேநீர் விருந்து யாருடைய தனிப்பட்ட நிதியிலிருந்தும் வழங்கப்படுவதில்லை. தமிழ் மக்களின் பணம் செலவிடப்படுகிறது. சொன்னது போல் சேமிப்பு இருந்ததா இல்லையா என்பதை அறிய, பில் (கோப்பு) வரும் வரை காத்திருப்போம்” எனத் தனது ட்விட்டரில் பதிவிட்டார்.

ஆளுநர் மாளிகைக்கு எவ்வளவுதான் செலவாகிறது? அரசு வட்டாரத்தில் தகவலைத் திரட்டினேன். கவர்னர் செயலகம், கவர்னர் இல்லம் என ராஜ்பவனுக்காக இரண்டு வகையான செலவுகளை அரசு செய்கிறது. அதன்படி 2021 – 2022 ஆண்டுக்கான செலவு விவரங்கள் கிடைத்தன.

முதலில் கவர்னரின் செயலகம் பற்றிய செலவுகளைப் முதலில் பார்ப்போம். கவர்னரின் செயலகத்தில் கவர்னரின் அலுவலக ரீதியிலான பணிகளைச் செய்வதற்காக பணியாளர்கள் இருப்பார்கள். அவர்களுக்காகவும் அலுவலகத்தின் பணிகளுக்காகவும் பணம் செலவிடப்படுகிறது. சம்பளத்திற்காக மட்டுமே 2021 – 2022-ம் ஆண்டுக்கு 1,60,79,000 கோடி ரூபாயைச் செலவிட்டிருக்கிறார்கள். என்னென்ன செலவுகள் எல்லாம் செய்யப்பட்டிருக்கின்றன?

அடிப்படை சம்பளம் -1,44,43,000

மருத்துவ படி – 36,000

மருத்துவ செலவுகள் – 50,000

படிகள் – 88,000

வீட்டு வாடகைப் படி – 12,23,000

பயண சலுகை – 30,000

நகர ஈட்டுப்படி – 2,09,000

அகவிலைப்படி – 32,50,000

சுற்று பயணப் படிகள் – 8,00,000

தொலைப்பேசி கட்டணம் – 5,00,000

சில்லறை செலவுகள் – 5,10,000

மின் கட்டணம் – 3,91,000

தபால் செலவு – 90,000

வண்டிகளின் பராமரிப்பு – 1,53,000

பொருள்கள் வாங்கியது – 1,00,000

அரசு வழக்கறிஞர் கட்டணம் – 1,00,000

ஒப்பந்த ஊதியம் – 57,09,000

பெட்ரோல் ஃ எரிபொருள் – 6,14,000

பராமரிப்பு – 42,000

ஸ்டேஷனரி – 1,29,000

மொத்தம் – 2,84,97,000

கவர்னரின் செயலகத்திற்கு மட்டுமே ஒரு ஆண்டிற்கு 2 கோடியே 84 லட்சத்து 97 ஆயிரம் ரூபாய் செலவிடப்பட்டுள்ளது. அப்படியென்றால் கவர்னரின் இல்லத்திற்கு என்னென்ன செலவுகள் செய்யப்படுகின்றன? அதன் விவரம் விரைவில்..