கன்னியாகுமரியில் உள்ள பிரசித்தி பெற்ற தூய அலங்கார உபகார மாதா திருத்தலத்தின் ஆண்டு திருவிழா மற்றும் ஆலயம் அடிக்கல் நாட்டிய 125-வது ஆண்டு பெருவிழா டிசம்பர் 5-ஆம் தேதி கொடியேற்றத்துடன்.
தொடங்குகிறது. 10 நாட்கள் நடைபெறும் இந்த திருவிழா டிசம்பர் 14 வரை நடைபெற உள்ளது.
திருவிழா நாட்களில் தினமும் அதிகாலை 5 மணி, 6.15 மணி, 10.30 மணிக்கு திருப்பலி நடைபெறும். 8 மணிக்கு நற்கருணை ஆராதனை, மாலை 6.30 மணிக்கு ஜெபமாலை, புகழ்மாலை மற்றும் திருப்பலி நடைபெறும்.
டிசம்பர் 5-ஆம் தேதி காலை 6 மணிக்கு தயாரிப்பு திருப்பலியுடன் விழா தொடங்குகிறது. காலை 8 மணிமுதல் மாலை 4 மணி வரை நேர்ச்சை கொடி பவனி நடைபெறும். மாலை 6 மணிக்கு திருக்கொடி ஏற்றம் மற்றும் திருப்பலி நடைபெறும். இதில் அருட்பணியாளர் ஜாண்ரூபஸ் தலைமை தாங்குகிறார். இரவு 9 மணிக்கு கலை நிகழ்ச்சிகள் நடைபெறும்.
டிசம்பர் 6 முதல் 12 வரை ஒவ்வொரு நாளும் மாலை 6 மணிக்கு பல்வேறு பங்குகளின் அருட்தந்தையர்கள் தலைமையில் திருப்பலி, மறையுரை நடைபெறும். பள்ளி மாணவர்கள் கலை நிகழ்ச்சிகள், அன்பியங்கள் ஆண்டு விழா, திருச்சப்பர பவனி போன்றவை இரவு நேரங்களில் நடைபெறும்.
டிசம்பர் 13-ஆம் தேதி காலை 11 மணிக்கு நோயாளர்களுக்கான சிறப்பு திருப்பலி நடைபெறும். மாலை 6 மணிக்கு கோட்டாறு மறைமாவட்ட ஆயர் நசரேன் சூசை தலைமையில் சிறப்பு மாலை ஆராதனையும் மறையுரையும் நடைபெறும். இரவு 9.30 மணிக்கு வாணவேடிக்கையும் புனித சூசையப்பர் தங்கத்தேர் பவனியும் நடைபெறும்.
இறுதி நாளான டிசம்பர் 14-ஆம் தேதி அதிகாலை 4.30 மணிக்கு தங்கத்தேர் திருப்பலி, காலை 6 மணிக்கு பெருவிழா நிறைவு திருப்பலி சென்னையின் மயிலை உயர்மறை மாவட்ட பேராயர் ஜார்ஜ் அந்தோணிசாமி தலைமையில் நடைபெறும். தொடர்ந்து ஆங்கிலம், மலையாளம், தமிழ் திருப்பலிகளும், மாதா மற்றும் சூசையப்பர் தங்கத் தேர்பவனிகளும் நடைபெறும்.
கன்னியாகுமரி, நெல்லை, தூத்துக்குடி, கேரளா உள்ளிட்ட பகுதிகளிலிருந்து ஆயிரக்கணக்கான இறைமக்கள் திருவிழாவில் பங்கேற்க உள்ளனர். திருவிழாவுக்கான ஏற்பாடுகளை கன்னியாகுமரி புனித அலங்கார உபகார மாதா திருத்தல பங்குதந்தை அருட்பணியாளர் உபால்டு மரியதாசன், பங்குப்பேரவை துணைத் தலைவர் டாலன் டிவோட்டா, செயலாளர் ஸ்டார்வின், பொருளாளர் ரூபன், துணை செயலாளர் இணை டெமி பங்குதந்தையர்கள், பங்கு அருட்சகோதரிகள் மற்றும் பங்குபேரவையினர், பங்குமக்கள் செய்து வருகின்றனர்.