அட்வான்ஸ் பணப் பிரச்சனையால் பூக்கடை ஊழியர் உடலில் பெட்ரோல் ஊற்றி தற்கொலை.!!

மதுரை திருப்பரங்குன்றம் அருள்மிகு சுப்பிரமணியசுவாமி திருக்கோயில் வாசல் முன்பாகவே, கொடுக்கல் வாங்கல் பிரச்சனை காரணமாக பூக்கடை ஊழியர் தன் உடலில் பெட்ரோல் ஊற்றி தற்கொலை செய்து கொண்ட சம்பவம் அப்பகுதியில் பெரும் அதிர்ச்சியையும், பரபரப்பையும் ஏற்படுத்தியுள்ளது.”

விருதுநகரைச் சேர்ந்த மனோகரன் என்பவரின் மகன் கணேசன். இவர் திருப்பரங்குன்றம் பெரிய ரதவீதி வெள்ளிமலை கிணற்றுத் தெருவில் வசிக்கும் குருசாமி என்பவரின் மனைவி கண்ணகி மற்றும் மகன் கார்த்திக் ஆகியோரின் வீட்டில் பக்கத்து வீட்டில் குடியிருந்து வந்துள்ளார். மேலும், கார்த்திக்குக்கு சொந்தமான பூக்கடையிலும் கணேசன் வேலை பார்த்து வந்துள்ளார்.

இதற்கிடையே, சில மாதங்களுக்கு முன்பு கணேசன் அங்கிருந்து விலகி, பாலு என்பவருக்குச் சொந்தமான மற்றொரு பூக்கடைக்கு வேலைக்குச் சென்றுள்ளார். இதனால் ஆத்திரமடைந்த கண்ணகியும், கார்த்திக்கும் தங்களது கடையில் வாங்கிய அட்வான்ஸ் பணத்தைத் திருப்பிக் கொடுக்குமாறு கணேசனிடம் தொடர்ந்து தகராறு செய்துள்ளனர். மேலும், பணத்தைத் தராவிட்டால் போலீசில் புகார் அளிப்பதாகவும் மிரட்டி வந்துள்ளனர்.

தற்கொலை முயற்சி மற்றும் சோகம்:
இந்த நிலையில், சம்பவத்தன்று காலை 9:40 மணியளவில் கடைக்கு வந்த கணேசனிடம் அவர்கள் மீண்டும் தகராறில் ஈடுபட்டுள்ளனர். இதனால் மனமுடைந்தும் ஆத்திரமடைந்தும் காணப்பட்ட கணேசன், திருநகர் பகுதியில் இருந்து பெட்ரோல் வாங்கி வந்து, கார்த்திக் பூக்கடைக்கு முன்பாகத் தன் உடலில் பெட்ரோலை ஊற்றி தீ வைத்துக் கொண்டார்.

உடலில் தீ பற்றியதால் அலறி துடித்தபடி கணேசன் அங்குமிங்கும் ஓடியுள்ளார். இதைக் கண்டு அதிர்ச்சியடைந்த பொதுமக்கள் மற்றும் பக்தர்கள் அலறியடித்து ஓட்டம் பிடித்தனர். உடனடியாக அருகில் இருந்தவர்கள் தண்ணீரை ஊற்றி தீயை அணைத்தனர்.

தகவலறிந்து வந்த கோயில் காவல் நிலைய போலீசார், படுகாயமடைந்த கணேசனை மீட்டு 108 ஆம்புலன்ஸ் மூலம் மதுரை ராஜாஜி அரசு மருத்துவமனைக்கு சிகிச்சைக்காக அனுப்பி வைத்தனர். ஆனால், அங்கு தீவிர சிகிச்சை அளிக்கப்பட்டும் பலனின்றி இன்று காலை 6:00 மணிக்கு கணேசன் பரிதாபமாக உயிரிழந்தார்.

இதுகுறித்து கோயில் காவல் நிலைய ஆய்வாளர் செந்தில்குமார் மற்றும் உதவி ஆய்வாளர் பாண்டி ஆகியோர் வழக்குப்பதிவு செய்து தலைமறைவாக உள்ள பூக்கடை உரிமையாளர்கள் கண்ணகி மற்றும் கார்த்திக் ஆகிய இருவரையும் தீவிரமாகத் தேடி வருகின்றனர்.

பிரசித்தி பெற்ற திருப்பரங்குன்றம் கோயில் வாசலிலேயே நடந்த இந்தத் தற்கொலைச் சம்பவம் தொடர்பான சிசிடிவி காட்சிகள் தற்போது வெளியாகி மக்களிடையே பெரும் பீதியையும் அச்சத்தையும் ஏற்படுத்தியுள்ளது.