மதுரை: தமிழ்நாடு சுகாதாரத் திட்டத்தின் கீழ் இயங்கி வரும் 108 அவசர ஊர்தி சேவையின் சுமார் 7,000 தொழிலாளர்களின் வாழ்வாதாரம், ஊதியம் மற்றும் பாதுகாப்பு தொடர்பான 11 அம்சக் கோரிக்கைகளை உடனடியாக நிறைவேற்ற வலியுறுத்தி, தமிழ்நாடு 108 அவசர ஊர்தி தொழிலாளர் முன்னேற்றச் சங்கம் (தொமுச) சார்பில் மதுரை மாவட்ட ஆட்சியரிடம் அதிகாரப்பூர்வ வேலைநிறுத்தப் போராட்ட அறிவிப்பு மனு வழங்கப்பட்டது.
11 அம்ச முக்கிய கோரிக்கைகள்:
- அரசே நேரடியாக ஏற்க வேண்டும்: 108 ஆம்புலன்ஸ் சேவையை தனியார் கூட்டு ஒப்பந்த (PPP) முறையிலிருந்து மாற்றி, தமிழ்நாடு அரசே நேரடியாக ஏற்று நடத்தி, 7,000 தொழிலாளர்களையும் பணி நிரந்தரம் செய்ய வேண்டும்.
- தொழிலாளர் தீர்ப்பாயத் தீர்ப்பு அமல்: O.P.No.07/2024 தீர்ப்பின்படி 2022-2023 முதல் 25% ஊதிய உயர்வு, 8.33% போனஸ் மற்றும் நிலுவைத் தொகைகளை உடனடியாக வழங்க வேண்டும்.
- 8 மணி நேர பணி முறை: பணி நேரத்தை 8 மணி நேரமாக (3 ஷிப்ட்) மாற்றி, ஊதியப் பலன்கள் பாதிக்காத வகையில் அமல்படுத்த வேண்டும்.
- 25% ஊதிய உயர்வு: நிர்வாகம் தன்னிச்சையாக வழங்கிய 10% ஊதிய உயர்வை ரத்து செய்து, 2026-ஆம் ஆண்டிற்கு 25% ஊதிய உயர்வு வழங்க வேண்டும்.
- மகப்பேறு விடுப்பு & காப்பீடு: பெண் தொழிலாளர்களுக்கு 1 ஆண்டு சம்பளத்துடன் கூடிய மகப்பேறு விடுப்பும், குடும்பத்திற்கான மருத்துவக் காப்பீட்டை ரூ.5 லட்சமாகவும் உயர்த்த வேண்டும்.
- உயிரிழப்பு காப்பீடு உயர்வு: பணியின் போது உயிரிழந்தால் ரூ.50 லட்சம், பிற நேரங்களில் உயிரிழந்தால் ரூ.30 லட்சம் காப்பீட்டுத் தொகை வழங்க வேண்டும்.
- பயிற்சி & வருகைப் பதிவு சீரமைப்பு: ‘Face Biometric’ முறையில் ‘In Time’ மற்றும் ‘Out Time’ இரண்டையும் கட்டாயமாகப் பதிவு செய்ய வேண்டும்.
- சரியான நேரத்தில் சம்பளம்: ஒவ்வொரு மாதத்தின் முதல் வேலை நாளிலேயே முழுச் சம்பளமும், 5-ஆம் தேதிக்குள் சம்பளப் பட்டியலும் (Salary Slip) வழங்க வேண்டும்.
- நிரந்தரப் பணி நியமனம்: ‘Fixed Term Employment’ முறையைக் கைவிட்டு, பணி நீக்கம் செய்யப்பட்ட தொழிலாளர்களுக்கு மீண்டும் பணி வழங்க வேண்டும்.
- விடுப்புப் பணப்பலன்கள் மீள வழக்கம்: நிறுத்தி வைக்கப்பட்டுள்ள 15 நாட்கள் ஈட்டிய விடுப்பு (EL), 10 நாட்கள் Paid Leave மற்றும் பண்டிகைக் கால இரட்டிப்புச் சம்பள நடைமுறையை மீண்டும் அமல்படுத்த வேண்டும்.
- பழிவாங்கும் பணிமாற்றம் தடுத்தல்: தண்டனை காலப் பணிமாற்றங்களை 400 கி.மீ தொலைவிற்கு செய்யாமல், சொந்த/அருகாமை மாவட்டங்களுக்குள் வெளிப்படையான முறையில் மேற்கொள்ள வேண்டும்.
போராட்டக் கால அட்டவணை: - அக்டோபர் 14, 2026 (புதன்கிழமை): மதுரை பழங்காநத்தம் ரவுண்டானா பகுதியில் காலை 9.00 மணி முதல் மாலை 5.00 மணி வரை பட்டினிப் போராட்டம்.
- நவம்பர் 03, 2026 (செவ்வாய்க்கிழமை): இரவு 8.00 மணி முதல் நவம்பர் 04, 2026 இரவு 8.00 மணி வரை 24 மணி நேர அடையாள வேலைநிறுத்தம்.
- நவம்பர் 04, 2026 (புதன்கிழமை): இரவு 8.00 மணி முதல் கோரிக்கைகள் நிறைவேறும் வரை காலவரையற்ற வேலைநிறுத்தம்.
தொழிற் தகராறுகள் சட்டம் 1947 பிரிவு 22(1)-ன் கீழ் இந்த வேலைநிறுத்த அறிவிப்பு நிர்வாகத்திற்கும் அரசுக்கும் முறைப்படி அளிக்கப்பட்டுள்ளதாகவும், அரசு உடனடியாக தலையிட்டு பேச்சுவார்த்தை நடத்தி கோரிக்கைகளை நிறைவேற்ற வேண்டும் என்றும் சங்கத்தின் சார்பில் கேட்டுக்கொள்ளப்பட்டுள்ளது.
