• Mon. Jan 30th, 2023

உலகக் கோப்பை கால்பந்து இறுதிப்போட்டி: அர்ஜென்டினாவுக்கு எதிராக களமிறங்கும் பிரான்ஸ்..!

மொராக்கோவை 2-0 என்ற கோல் கணக்கில் வீழ்த்தி 4-வது முறையாக பிரான்ஸ் அணி இறுதிசுற்றுக்குள் அடியெடுத்து வைத்தது.
22-வது உலகக் கோப்பை கால்பந்து திருவிழா கத்தாரில் நடந்து வருகிறது. இதில் நள்ளிரவு அல்பேத் ஸ்டேடியத்தில் நடந்த 2-வது அரைஇறுதியில் பிரான்ஸ் அணி, மொராக்கோவை எதிர்கொண்டது. இந்நிலையில் பரபரப்பாக தொடங்கிய ஆட்டத்தின் முதல் பாதியின் 5-வது நிமிடத்திலே பிரான்ஸ் அணி வீரர் தியோ ஹெர்னண்டஸ் தனது அணிக்கான முதல் கோலை அடித்து ரசிகர்களை பரவசமடையச் செய்தார். தொடர்ந்து நடைபெற்ற ஆட்டத்தில் மொராக்கோ அணியினர் கோல் அடிக்க எடுத்துக் கொண்ட முயற்சிகள் எதுவும் பலனளிக்கவில்லை. இதன்மூலம் ஆட்டத்தின் முதல் பாதியில் பிரான்ஸ் அணி 1-0 என்ற கோல் கணக்கைல் முன்னிலை வகித்தது.
அடுத்து தொடங்கிய இரண்டாவது பாதியில் இரு அணிகளுக்கும் இடையே அனல் பறந்தது. இந்த சூழலில் ஆட்டத்தின் 79-வது நிமிடத்தில் பிரான்ஸ் அணி வீரர் ராண்டல் கோலோ முஆனி தனது அணிக்கான இரண்டாவது கோலை அடித்து அணியின் வெற்றி வாய்ப்பை பிரகாசமாக்கினார். தொடர்ந்து நடைபெற்ற ஆட்டத்தில் மொராக்கோ அணியினர் எவ்வளவோ போராடியும் கோல் அடிக்கும் வாய்ப்பை இழந்தனர். பின்னர் கொடுக்கப்பட்ட கூடுதல் நேரத்திலும் கோல் எதுவும் அடிக்காததால் பிரான்ஸ் அணி 2-0 என்ற கோல் கணக்கில் மொரோக்கோ அணியை வெளியேற்றியது. எப்படியாவது வெற்றிபெற்று விடும் என்று எதிர்பார்த்த மொராக்கோ ரசிகர்களுக்கு ஏமாற்றமே மிஞ்சியது. மொராக்கோ தோல்வியடைந்ததன் மூலம் பிரான்ஸ் அணி இறுதிப்போட்டியில் அர்ஜென்டினாவை சந்திக்கிறது. இரு அணிகளும் பலம்வாய்ந்தது என்பதால் போட்டி கடுமையாக இருக்கும். இறுதிப்போட்டியில் விளையாடும் மெஸ்ஸிக்கு அதுவே கடைசி போட்டி என்று அறிவித்துள்ளார். தனது அணிக்கு கோப்பையை கைப்பற்றி தருவார் என்ற எதிர்பார்ப்பு நிலவுகிறது. இறுதிப்போட்டி வரும் 18ம் தேதி
(ஞாயிற்றுக் கிழமை) நடைபெற உள்ளது.
முன்னதாக நடப்பு சாம்பியன் அந்தஸ்துடன் வலம் வரும் தரவரிசையில் 4-வது இடம் வகிக்கும் பிரான்ஸ் அணி லீக் சுற்றில் 2 வெற்றி, ஒரு தோல்வியுடன் முதலிடம் பிடித்தது. 2-வது ரவுண்டில் 3-1 என்ற கோல் கணக்கில் போலந்தையும், காலிறுதியில் 2-1 என்ற கோல் கணக்கில் இங்கிலாந்தையும் பதம் பார்த்து அரைஇறுதியை எட்டியிருந்தது குறிப்பிடத்தக்கது.
இந்த உலகக் கோப்பையில் கணிக்க முடியாத ஒரு அணியாக அரையிறுதிக்குள் நுழைந்து ஆச்சரியப்படுத்தியிருந்தது மொராக்கோ. அரையிறுதியை எட்டிய முதல் ஆப்பிரிக்க அணி என்ற சரித்திர சிறப்பையும் பெற்றிருந்தது குறிப்பிடத்தக்கது.

Leave a Reply

Your email address will not be published. Required fields are marked *