மதுரை பைபாஸ் சாலையில் உள்ள ‘தனிஷ்க்’ நகைக்கடையில் பல கோடி ரூபாய் மதிப்புள்ள நகைகள் கொள்ளையடிக்கப்பட்ட சம்பவம் தமிழகம் முழுவதும் பெரும் பரபரப்பை ஏற்படுத்தியது.

இது தொடர்பாக மதுரை மாநகர காவல்துறை சார்பில் 9 தனிப்படைகள் அமைக்கப்பட்டு தீவிர விசாரணை நடத்தப்பட்டது. இதில், கொள்ளைச் சம்பவத்தில் ஈடுபட்டது நிஷாந்த் என்பது உறுதி செய்யப்பட்டது. இதையடுத்து, நிஷாந்தின் தந்தை சுரேஷ் மற்றும் தோழி மீனாட்சி ஆகியோரைக் கைது செய்த காவல்துறையினர், அவர்களிடமிருந்து 5.5 கிலோ தங்க நகைகளை மீட்டனர். தொடர்ந்து, தருமபுரி மாவட்டத்தில் ஆம்னி பேருந்தில் தப்பிச் சென்ற முக்கிய குற்றவாளியான நிஷாந்தை, பேருந்து ஓட்டுநரின் உதவியுடன் தனிப்படை போலீசார் மடக்கிப் பிடித்தனர். அவரிடம் நடத்தப்பட்ட விசாரணையில் மேலும் 6.2 கிலோ தங்க நகைகள் மீட்கப்பட்டன. இதனைத் தொடர்ந்து, கைது செய்யப்பட்ட மூவரும் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர்.

ஆணையர் விளக்கமும், ஏ.ஐ வீடியோ குழப்பமும்:
இந்த வழக்கில் கொள்ளையடிக்கப்பட்ட நகைகளின் அளவு குறித்து காவல்துறை ஆணையர் செய்தியாளர்களிடம் விளக்கம் அளித்திருந்தார். அதில், “ஆரம்பத்தில் 15 முதல் 18 கிலோ வரை தங்க நகைகள் கொள்ளையடிக்கப்பட்டதாகக் கருதப்பட்ட நிலையில், முறையான கணக்கீட்டிற்குப் பிறகு 11 கிலோ 384 கிராம் தங்க நகைகள் மட்டுமே கொள்ளையடிக்கப்பட்டது உறுதி செய்யப்பட்டுள்ளது” எனத் தெரிவித்திருந்தார். மேலும், இதில் பெரும்பாலான நகைகள் மீட்கப்பட்டுவிட்டதாகவும் கூறப்பட்டது.

ஆனால், இதுவரை முறையான எழுத்துப்பூர்வ செய்திக்குறிப்பு எதையும் வெளியிடாத காவல்துறை, தனது அதிகாரப்பூர்வ முகநூல் (Facebook) பக்கத்தில் வெளியிட்டுள்ள ஏ.ஐ (AI) தொழில்நுட்ப வீடியோ தற்போது புதிய சர்ச்சையையும் குழப்பத்தையும் கிளப்பியுள்ளது.
- ஏற்கனவே வெளியிடப்பட்ட முதல் ஏ.ஐ வீடியோவில், நிஷாந்தின் தந்தை சுரேஷ் கைது செய்யப்பட்டு 5.5 கிலோ நகை மீட்கப்பட்டதாகத் தெரிவிக்கப்பட்டிருந்தது.
- இந்நிலையில், தற்போது வெளியிடப்பட்டுள்ள புதிய ஏ.ஐ வீடியோவில், 15 கிலோ தங்க நகைகளுடன் 3 கிலோ வைர நகைகளும் கொள்ளையடிக்கப்பட்டதாகவும், கைது செய்யப்பட்ட சுரேஷ் என்பவர் நிஷாந்தின் ‘தம்பி’ எனவும் குறிப்பிடப்பட்டுள்ளது.
எழும் கேள்விகள்:
காவல்துறை ஆணையர் 11.384 கிலோ தங்கம் மட்டுமே கொள்ளை போனதாகக் கூறிய நிலையில், தமிழக காவல்துறையின் சமூக வலைதளப் பக்கத்தில் ‘3 கிலோ வைர நகைகள்’ கொள்ளையடிக்கப்பட்டதாகத் தகவல் வெளியாகியிருப்பது பொதுமக்கள் மற்றும் ஊடகங்கள் மத்தியில் பெரும் குழப்பத்தை ஏற்படுத்தியுள்ளது.
உண்மையிலேயே இந்தக் கொள்ளையில் வைர நகைகள் திருடப்பட்டதா? அப்படியானால் அவை மீட்கப்பட்டனவா அல்லது இந்த வழக்கில் இன்னும் கூடுதல் நகைகள் பறிமுதல் செய்யப்பட வேண்டியுள்ளதா? என்ற கேள்வி தற்போது எழுந்துள்ளது. தொழில்நுட்பக் கோளாறால் இந்தத் தவறான தகவல் ஏ.ஐ வீடியோவில் பதிவானதா என்பது குறித்து காவல்துறை தரப்பில் உரிய விளக்கம் அளிக்க வேண்டும் என எதிர்பார்க்கப்படுகிறது.
