• Sat. Nov 21st, 2026
WhatsApp Image 2026-11-20 at 00.10.17 (2)
previous arrow
next arrow
Read Now

மதுரையில் சொத்து தகராறு காரணமாக வாலிபர் வெட்டிப் படுகொலை..!

ByKalamegam Viswanathan

Nov 21, 2026

மதுரை அருகே பரவையில் சொத்து தகராறு காரணமாக 25 வயது இளைஞர் மர்ம நபர்களால் வெட்டிப் படுகொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.

மதுரை மாவட்டம், சமயநல்லூர் காவல் சரகத்திற்கு உட்பட்ட பரவை பகுதியைச் சேர்ந்தவர் பெரியசாமி. இவரது மகன் சந்தோஷ் (வயது 25). இவரது குடும்பத்தினருக்கும், உறவினர்களுக்கும் இடையே நீண்ட நாட்களாகப் பூர்வீகச் சொத்து தொடர்பாகத் தகராறு இருந்து வந்ததாகக் கூறப்படுகிறது.

இந்நிலையில், இன்று (சனிக்கிழமை) மாலை சந்தோஷ் அப்பகுதியில் நடந்து சென்று கொண்டிருந்தார். அப்போது அங்கு வழிமறித்த மர்ம நபர்கள் சிலர், சந்தோஷிடம் வாக்குவாதத்தில் ஈடுபட்டுள்ளனர். வாக்குவாதம் முற்றிய நிலையில், ஆத்திரமடைந்த அந்த கும்பல் தாங்கள் மறைத்து வைத்திருந்த அரிவாள் உள்ளிட்ட பயங்கர ஆயுதங்களால் சந்தோஷை சரமாரியாக வெட்டிவிட்டு அங்கிருந்து தப்பி ஓடியது.
இதில் தலை மற்றும் கழுத்துப் பகுதிகளில் பலத்த வெட்டுக்காயம் அடைந்த சந்தோஷ், ரத்த வெள்ளத்தில் சரிந்து சம்பவ இடத்திலேயே பரிதாபமாக உயிரிழந்தார்.

இது குறித்துத் தகவல் அறிந்த சமயநல்லூர் காவல் நிலைய போலீசார் சம்பவ இடத்திற்கு விரைந்து சென்று விசாரணை நடத்தினர். தொடர்ந்து, உயிரிழந்த சந்தோஷின் உடலைக் கைப்பற்றி பிரேதப் பரிசோதனைக்காக மதுரை அரசு ராஜாஜி மருத்துவமனைக்கு அனுப்பி வைத்தனர்.

முதற்கட்ட விசாரணையில், முன்விரோதம் மற்றும் சொத்து தகராறு காரணமாக இந்தக் கொலை நடந்திருப்பது தெரியவந்துள்ளது. இது தொடர்பாக வழக்குப் பதிவு செய்துள்ள சமயநல்லூர் போலீசார், தப்பியோடிய கொலையாளிகளைப் பிடிக்கத் தனிப்படை அமைத்துத் தீவிரமாகத் தேடி வருகின்றனர். மக்கள் நடமாட்டம் மிகுந்த மாலை நேரத்தில் நடந்த இந்தப் படுகொலைச் சம்பவம் பரவை பகுதியில் பெரும் அதிர்ச்சியையும், பதற்றத்தையும் ஏற்படுத்தியுள்ளது.