மதராஸி வசூல் ரிப்போர்ட்!

துப்பாக்கி’, ‘சிக்கந்தர்’ புகழ் ஏ.ஆர்.முருகதாஸ் இயக்கத்தில் சிவகார்த்திகேயனின் மிகவும் எதிர்பார்க்கப்பட்ட த்ரில்லர் படமான ‘மதராசி’, மிகுந்த எதிர்பார்ப்புகளுடனும் செப்டம்பர் 5 ஆம் தேதி ரிலீஸ் ஆனது.

படம் முதல் நாளில் ரூ. 13.65 கோடியுடன் திரையரங்குகளில் சாதனை படைத்தது. அதைத் தொடர்ந்து சனி மற்றும் ஞாயிற்றுக்கிழமைகளில் முறையே ரூ. 12.1 கோடி மற்றும் ரூ. 11.4 கோடி வசூலித்தது. அதன் முதல் மூன்று நாட்களின் முடிவில், படம் ரூ. 37 கோடியைத் தாண்டியது.

இருப்பினும், அடுத்த வார நாட்களில் பெரிய சரிவு ஏற்பட்டது. மதராசி 13 ஆம் நாள் (புதன்கிழமை) சுமார் ரூ. 66 லட்சங்களை ஈட்டியது.  இதன் மொத்த இந்திய நிகர வசூல் ரூ. 59.41 கோடியாக உள்ளது.

ரூ. 60 கோடி மைல்கல்லை நெருங்கினாலும், படத்தின் இரண்டாவது வாரத்தில் படத்தின் வருவாய் கணிசமாகக் குறைந்துள்ளது.

சௌந்தர்யாவுடன் சேர்ந்து நானும் போக வேண்டியது…- மீனா பகிர்ந்த ஷாக்!

நடிகை மீனா தென்னிந்தியத் திரையுலகில் குழந்தைப் பருவத்திலேயே அறிமுகமாகி, பல்வேறு வேடங்களில் நடித்து ரசிகர்களின் அன்பைப் பெற்றவர். முன்னணி நடிகையாக வெற்றி பெற்ற பிறகு, மீனா தற்போது சவாலான வேடங்களில் நடித்து வருகிறார், மேலும் தன்னைத் தொடர்ந்து இந்தத் துறையில் சுறுசுறுப்பாக வைத்திருக்கிறார். சுந்தர் சி இயக்கத்தில் நயன்தாரா நடிக்கும் ‘மூக்குத்தி அம்மன் 2’ படத்தில் அவர் முக்கிய வேடத்தில் நடிக்கிறார்.

சமீபத்தில் ஒரு நிகழ்ச்சியில் கலந்து கொண்ட அவர், தனது நெருங்கிய தோழியும் மறைந்த நடிகையுமான சௌந்தர்யாவை நினைவு கூர்ந்தார். சௌந்தர்யாவை பற்றி பேசும்போதே உடைந்து கண் கலங்கினார்.

“எங்களுக்கு இடையேயான போட்டி எப்போதும் ஆரோக்கியமானது. அவர் எனக்கு மிகவும் நெருங்கிய தோழி. அவரது திடீர் மரணச் செய்தியைக் கேட்டு நான் அதிர்ச்சியடைந்தேன். இன்றுவரை, அந்த அதிர்ச்சியிலிருந்து என்னால் முழுமையாக மீள முடியவில்லை. அந்த விபத்து நடந்த நாளில், நான் சௌந்தர்யாவுடன் பிரச்சாரத்திற்குச் செல்லவிருந்தேன். எனக்கும் அழைப்பு வந்தது. ஆனால், அரசியல் மற்றும் தேர்தல் பிரச்சாரங்கள் பிடிக்காததால், படப்பிடிப்பு இருப்பதாகக் கூறி அதைத் தவிர்த்துவிட்டேன். அதன் பிறகு நடந்ததைக் கேள்விப்பட்டபோது நான் மிகவும் மனமுடைந்து போனேன்” என்று கூறியுள்ளார் மீனா.

2004 ஆம் ஆண்டு, சௌந்தர்யாவும் அவரது சகோதரரும் தேர்தல் பிரச்சாரத்திற்காக விமானத்தில் பயணம் செய்தபோது விமான விபத்தில் இறந்தனர். சௌந்தர்யாவின் எதிர்பாராத மறைவு திரைப்படத் துறையை உலுக்கியது. அதுபற்றிய இன்னொரு அதிர்ச்சியைதான் இப்போது மீனா ஷேர் செய்திருக்கிறார்.

லாரன்ஸின் புதிய தொடக்கம்: கண்மணி அன்னதான விருந்து

சமூக சேவைகளுக்கு பெயர் பெற்றா நடிகர் ராகவா லாரன்ஸ், செப்டம்பர் 17 ஆம் தேதி முதல் தனது தாயார் கண்மணி பெயரில் அன்னதான விருந்து என்ற திட்டத்தைத் தொடங்கியுள்ளார்.

இதுகுறித்து அவர்,  “இன்று, என் மனதிற்கு நெருக்கமான ஒரு புதிய முயற்சியைத் தொடங்கினேன் – கண்மணி அன்னதான விருந்து, என் அம்மாவின் பெயரால் பெயரிடப்பட்டுள்ளது.

இந்த முயற்சியின் எனது குறிக்கோள், பொதுவாக பணக்காரர்கள் மட்டுமே அனுபவிக்கும் உணவு வகைகளை, அத்தகைய உணவு வகைகளை ஒருபோதும் காணாத ஏழை  மக்களும் சாப்பிடும்படி மாற்றுவதாகும். உணவு ஒரு பாக்கியமாக இருக்கக்கூடாது, அது ஒவ்வொரு இதயத்திலும் புன்னகையைத் தரும் மகிழ்ச்சியாக இருக்க வேண்டும்.

குழந்தைகள் மற்றும் பெரியவர்களைக் கொண்ட நரிக் குறவர்கள் சமூகத்துடன் இந்தப் பயணத்தைத் தொடங்கியதில் நான் பணிவுடன் இருக்கிறேன். பலவகையான உணவுகளை அவர்கள் ரசித்ததில் அவர்களின் மகிழ்ச்சியைக் கண்டு என் இதயம் நன்றியால் நிறைந்தது.

உங்கள் அனைவரின் அன்புடனும் ஆசீர்வாதத்துடனும், அனைவரின் பசியையும் பூர்த்தி செய்யும் இந்தப் பயணத்தைத் தொடர்கிறேன்” என்று கூறியுள்ளார்.

மோடியாக நடிக்கும் உண்ணி…

நமது நாட்டின்  மாண்புமிகு பிரதமர்  நரேந்திர மோடியின் பிறந்த நாளான செப்டம்பர் 17 ஆம் தேதி, “மா வந்தே” எனும் மோடியின்  வாழ்க்கை வரலாற்றுத் திரைப்படத்துக்கான அறிவிப்பை சில்வர் காஸ்ட் கிரியேஷன்ஸ்  வெளியிட்டது..

பிரதமர் நரேந்திர மோடி அவர்களின் முக்கிய கதாபாத்திரத்தில் நடிகர் உண்ணி முகுந்தன் நடித்துள்ளார்.   மோடியின்ன் சிறு வயது முதல்  நாட்டின் பிரதமராக உயர்ந்த வரலாற்றையும் உண்மை சம்பவங்களையும் அடிப்படையாகக் கொண்டும் இந்த படம்  உருவாக்கப்படுகிறது.  மோடியின்  தாயார் ஸ்ரீமதி ஹீராபென் மோடி அவர்களுடனான ஆழமான பந்தத்தை இத்திரைப்படம் வெளிப்படுத்துகிறது என்கிறார்கள்.

சர்வதேச தரத்திலும், அற்புதமான VFX தொழில்நுட்பங்களுடனும், இந்தியாவின் முன்னணி நுட்ப நிபுணர்களின் பங்களிப்புடனும் இந்தப் படம் உருவாக்கப்படுகிறது. பான்-இந்தியா அளவில் இந்திய மொழிகள் அனைத்திலும் வெளியீடு செய்யப்படுவதோடு, ஆங்கிலத்திலும் தயாரிக்கப்படுகிறது.