மதுரை பைபாஸ் ரோடு, நேரு நகரில் அமைந்துள்ள பிரபல தனிஷ்க் (Tanishq) நகைக்கடையில் நடைபெற்ற கொள்ளைச் சம்பவத்தில், சுமார் 10 கிலோ தங்க நகைகளும், 1 கிலோ வைர நகைகளும் கொள்ளையடிக்கப்பட்டுள்ளதாகக் காவல்துறை அதிகாரப்பூர்வமாகத் தெரிவித்துள்ளது.
நேற்று நடைபெற்ற இந்தத் துணிகரக் கொள்ளைச் சம்பவம் தொடர்பாகக் காவல்துறை வழக்குப்பதிவு செய்துள்ளது. கடையின் நிர்வாகத்தினர் மற்றும் ஊழியர்களுடன் இணைந்து காவல்துறையினர் நடத்திய முழுமையான இருப்புப் பட்டியல் (Stock Verification) சரிபார்ப்பின் முடிவில், 10 கிலோ எடையுள்ள தங்க நகைகள் மற்றும் 1 கிலோ எடையுள்ள வைர நகைகள் திருடு போயிருப்பது உறுதி செய்யப்பட்டுள்ளது.
இதனைத் தொடர்ந்து, இரண்டாவது நாளாக இன்றும் காலை முதலே காவல்துறை உயர் அதிகாரிகள் சம்பவ இடமான நேரு நகர் நகைக்கடையில் முகாமிட்டு, தடயவியல் நிபுணர்களின் உதவியுடன் தொடர்ந்து தீவிர விசாரணை மேற்கொண்டு வருகின்றனர்.
மேலும், இந்தக் கொள்ளைச் சம்பவத்தில் ஈடுபட்ட குற்றவாளிகளை விரைந்து பிடிக்க 9 தனிப்படைகள் அமைக்கப்பட்டுள்ளன. சம்பவம் நடைபெற்ற பகுதி மட்டுமல்லாமல், மதுரை ரயில் நிலையம், பேருந்து நிலையங்கள் மற்றும் சுற்றுவட்டாரப் பகுதிகளில் உள்ள அனைத்து சிசிடிவி (CCTV) கேமரா காட்சிகளையும் காவல்துறையினர் தங்கள் கட்டுப்பாட்டில் கொண்டு வந்து ஆய்வு செய்து வருகின்றனர்.
இதன் அடிப்படையில், தனிப்படை போலீசார் பல்வேறு இடங்களுக்கு விரைந்து தீவிரத் தேடுதல் வேட்டையில் ஈடுபட்டு வருகின்றனர். மக்கள் நடமாட்டம் மிகுந்த பைபாஸ் ரோடு பகுதியில் நடைபெற்றுள்ள இந்தச் சம்பவம் பொதுமக்கள் மற்றும் வியாபாரிகளிடையே பெரும் பரபரப்பை ஏற்படுத்தியுள்ளது.
