விருதுநகர் மாவட்டம் சிவகாசி வனமூர்த்தி லிங்கபுரம் முருகன் என்பவருக்கு சொந்தமான கார்த்திகா பட்டாசு ஆலையில் கடந்த 14-ம் தேதி பட்டாசு தயாரிக்க தேவையான ரசாயன மூலப் பொருட்களை சரக்கு லாரியிலிருந்து வெடி பொருட்கள் சேமிப்பு கிடங்கில் இறக்கிக்கொண்டிருந்தபோது எதிர்பாராத விதமாக ஏற்பட்ட உராய்வின் காரணமாக வெடி விபத்து ஏற்பட்டது.
இந்த வெடி விபத்தில் ரசாயன மூலப்பொருட்கள் சேமிப்பு கிடங்கு முற்றிலும் இடிந்து சேதமடைந்தது. இதில் சரக்கு வாகனம் எரிந்து சேதமானது. இந்த வெடி விபத்தில் ரசாயன மூலப்பொருட்களை இறக்கிக் கொண்டிருந்த நாரணாபுரம் புதூரைச் சேர்ந்த புலித்துரை (வயது 36) என்பவர் 100% தீக்காயத்துடன் உயிருக்கு ஆபத்தான நிலையில் மதுரை தனியார் மருத்துவமனையில் மேல் சிகிச்சை பெற்று வந்த நிலையில் இன்று சிகிச்சை பலனின்றி பரிதாபமாக உயிரிழந்தார்.
மேலும் இந்த விபத்து தொடர்பாக வழக்கு பதிவு செய்த ஆலங்குளம் போலீசார் கார்த்திகாஸ் பட்டாசு ஆலையின் மேலாளர் அருள் பிரசாத் என்பவரை கைது செய்யப்பட்டுள்ளது குறிப்பிடத்தக்கது.
