மதுரை மாவட்டம் சிலைமான் காவல் நிலைய எல்லைக்குட்பட்ட விராதனூர் மற்றும் சத்யா நகர் பகுதியில் நடைபெற்ற பயங்கரமான மோதலில், இருசக்கர வாகனத்தில் சென்ற வாலிபர் மீது கார் ஏற்றி விகாரமாக வெட்டிக் கொல்லப்பட்ட சம்பவம் அப்பகுதியில் பெரும் அதிர்ச்சியையும், பரபரப்பையும் ஏற்படுத்தியுள்ளது.
நள்ளிரவில் நடந்த கொடூரம்:
காவல்துறையினர் தரப்பில் கூறப்படுவதாவது: மதுரை மாவட்டம் சத்யா நகர் பகுதியைச் சேர்ந்த சந்தோஷ்குமார் (24) மற்றும் தினேஷ் (20) ஆகிய இருவரும் நேற்று நள்ளிரவு சுமார் 11 மணியளவில் தங்களது இருசக்கர வாகனத்தில் (டூவீலர்) அப்பகுதியில் சென்று கொண்டிருந்தனர். அப்போது, அவர்களைப் பின்தொடர்ந்து வந்த மர்மக் கும்பல் ஒன்று, திடீரென தாங்கள் வந்த காரை சந்தோஷ்குமார் மற்றும் தினேஷ் வந்த டூவீலர் மீது பலமாக மோதியுள்ளது.
இந்த எதிர்பாராத மோதலில் இருவரும் நிலைதடுமாறி கீழே விழுந்தனர். காரில் இருந்து இறங்கிய அந்த கும்பல், கீழே கிடந்த இருவரையும் கண்மூடித்தனமாக சராமாரியாக வெட்டியது. இந்தத் தாக்குதலில் பலத்த வெட்டுக்காயங்களுடன் சந்தோஷ்குமார் சம்பவ இடத்திலேயே பரிதாபமாக உயிரிழந்தார். அவருடன் வந்த தினேஷ் படுகாயங்களுடன் உயிர் தப்பினார்.
மருத்துவமனையில் அனுமதி & போலீஸ் விசாரணை:
சம்பவம் குறித்து தகவல் அறிந்ததும் சிலைமான் காவல் நிலைய போலீசார் உடனடியாக விரைந்து சென்று, ரத்த வெள்ளத்தில் உயிருக்குப் போராடிக்கொண்டிருந்த தினேஷ் மீட்டு சிகிச்சைக்காக மதுரை அரசு ராஜாஜி மருத்துவமனைக்கு (GRH) அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. மேலும், உயிரிழந்த சந்தோஷ்குமாரின் உடல் கைப்பற்றப்பட்டு பிரேதப் பரிசோதனைக்காக அனுப்பி வைக்கப்பட்டது.
பழிக்குப்பழி கொலை:
முதற்கட்ட விசாரணையில், விராதனூர் பகுதியில் கடந்த ஆறு மாதங்களுக்கு முன்பு நடைபெற்ற கொலை முயற்சி சம்பவம் தொடர்பாக ஏற்பட்ட முன்விரோதமே இந்த கொடூரத் தாக்குதலுக்குக் காரணம் என்பது தெரியவந்துள்ளது. அந்தப் பகையைத் தீர்க்கும் வகையிலேயே தற்போது பழிக்குப்பழியாக இந்த கொலைச் சம்பவம் அரங்கேறி இருப்பதாக போலீசார் சந்தேகிக்கின்றனர்.
சிலைமான் போலீசார் வழக்குப்பதிவு செய்து, தலைமறைவாக உள்ள குற்றவாளிகளைத் தீவிரமாகத் தேடி வருகின்றனர். நள்ளிரவில் அரங்கேறிய இந்த படுகொலைச் சம்பவம் அப்பகுதி மக்களிடையே பெரும் அச்சத்தை ஏற்படுத்தியுள்ளது