• Wed. Nov 18th, 2026

காவிரி விவகாரத்தில் கர்நாடக முதல்வர் பொய் பிரசாரம் செய்கிறார் – துரை வைகோ குற்றச்சாட்டு..!

BySeenu

Nov 18, 2026

சேலம் செல்வதற்காக சென்னையில் இருந்து விமானம் மூலம் கோவை வந்த மதிமுக முதன்மை செயலாளரும் நாடாளுமன்ற உறுப்பினருமான துரை வைகோ விமான நிலையத்தில் செய்தியாளர்களை சந்தித்தார் .அப்போது பேசிய அவர்,

காவிரி நதிநீர் விவகாரத்தில் தமிழ்நாட்டிற்கு தண்ணீர் வழங்க வேண்டும் என்பதில் உச்சநீதிமன்றத் தீர்ப்பு தெளிவாக உள்ள நிலையில், அந்தத் தீர்ப்பைத் திரித்துப் பேசி கர்நாடக முதலமைச்சர் பொய்யான தகவல்களைப் பரப்பி வருவதாகக் குற்றம்சாட்டினார். பிரதமர் மோடி பங்கேற்ற நிகழ்ச்சியிலேயே கர்நாடக முதலமைச்சர் இவ்வாறு பேசியிருப்பது கண்டிக்கத்தக்கது என்றும், இதனை தமிழக பாஜக தலைவர்களும் கேள்வி எழுப்ப வேண்டும் என்றும் தெரிவித்தார்.

காவிரி விவகாரத்தில் தமிழக அரசு கர்நாடக அரசுக்கு எதிராக சட்டரீதியான நடவடிக்கைகளைத் தொடர்ந்து மேற்கொண்டு வருவதாகவும், இரு மாநிலங்களுக்கிடையிலான நீர் பிரச்சினைக்கு மத்திய அரசு உரிய தீர்வு காண வேண்டும் என்றும் வலியுறுத்தினார். நீர் மேலாண்மை அமைப்பு வழங்கிய அறிவுறுத்தல்களைக்கூட கர்நாடக அரசு முறையாகப் பின்பற்றவில்லை என்றும் குற்றம்சாட்டினார்.

மேலும், யார் தவறு செய்திருந்தாலும் அவர்கள் மீது உரிய நடவடிக்கை எடுக்கப்பட வேண்டும் என்பதே தங்களது நிலைப்பாடு என்றும், அதிகாரிகளாக இருந்தாலும் அமைச்சர்களாக இருந்தாலும் தவறு செய்தவர்கள் தண்டிக்கப்பட வேண்டும் என்றும் கூறினார்.

சட்டமன்றத் தேர்தலுக்குப் பிறகு திமுக தலைவர் மு.க.ஸ்டாலின் மறைமுகக் கூட்டணி அமைக்க முயற்சி செய்ததாகக் குற்றம்சாட்டிய துரை வைகோ, 40 கோடி ரூபாய் தொடர்பாகப் பேரம் பேசப்பட்டதாகவும், மறைமுகக் கூட்டணி குறித்த பேச்சுவார்த்தைகள் தற்போதும் தொடர்ந்து நடைபெற்று வருவதாகவும் தெரிவித்தார்.

கள்ளக்குறிச்சி விவகாரம் குறித்துப் பேசிய அவர், சம்பந்தப்பட்ட சட்டமன்ற உறுப்பினர் அத்தகைய சம்பவம் நடைபெறவில்லை என்று கூறியுள்ளதாகவும், மாவட்ட ஆட்சியர் இதுதொடர்பாக புகார் அளித்ததாகத் தெரியவில்லை என்றும் தெரிவித்தார். ஆனால், துணை முதலமைச்சர் உதயநிதி ஸ்டாலின் பொதுவெளியில் இழிவுபடுத்தும் வகையில் பேசியிருப்பது ஏற்புடையதல்ல என்றும் விமர்சித்தார்.

நூலகப் புத்தகக் கொள்முதல் விவகாரத்தில் பல்வேறு முறைகேடுகள் நடைபெற்றுள்ளதாகக் குற்றம்சாட்டிய அவர், அரசு விசாரணை மேற்கொண்டு வரும் இந்த விவகாரத்தில் தவறு செய்தவர்கள் மீது உடனடியாக நடவடிக்கை எடுக்க வேண்டும் என வலியுறுத்தினார். புத்தகக் கொள்முதல் முறைகேடு இந்தியாவிலேயே மிகப்பெரிய முறைகேடுகளில் ஒன்றாக இருப்பதாகவும் அவர் கூறினார்.

ஜெம் வீரமணி தொடர்பான வழக்கில் கடந்த 15 முதல் 20 ஆண்டுகளாக நடைபெற்ற பல்வேறு விவகாரங்கள் குறித்து தொடர்ந்து விசாரணை நடைபெற்று வருவதாகவும் தெரிவித்தார்.

ஸ்டெர்லைட் விவகாரம் தொடர்பாக துரை வைகோ கருத்துத் தெரிவித்து வந்தபோது, செய்தியாளர்கள் எழுப்பிய கேள்வியால் அவருக்கும் செய்தியாளர்களுக்கும் இடையே சிறிது நேரம் வாக்குவாதம் ஏற்பட்டது.