• Fri. Nov 20th, 2026
WhatsApp Image 2026-11-20 at 00.10.17 (2)
previous arrow
next arrow
Read Now

மீனாட்சிக்கும் இதற்கும் எந்த சம்பந்தமும் இல்லை” -நிஷாந்த் பரபரப்புத் தகவல்…

ByKalamegam Viswanathan

Nov 20, 2026

மதுரை பைபாஸ் சாலையில் உள்ள பிரபல தனியார் (தனிஷ்க்) நகைக்கடையில் சுமார் 11.7 கிலோ தங்கம் மற்றும் வைர நகைகள் கொள்ளையடிக்கப்பட்ட வழக்கு, நாளுக்கு நாள் புதிய திருப்பங்களையும் பரபரப்பையும் ஏற்படுத்தி வருகிறது.

வழக்கின் பின்னணி:
கடந்த சில நாட்களுக்கு முன்பு, இரவு நேரத்தில் நகைக்கடையின் சுவரைத் துளையிட்டு உள்ளே புகுந்த மர்ம நபர், அங்கிருந்த சுமார் ரூ.15 கோடி மதிப்பிலான 11.7 கிலோ தங்கம் மற்றும் வைர நகைகளைக் கொள்ளையடித்துச் சென்றார். இந்தத் துணிகரக் கொள்ளைச் சம்பவம் மதுரை மாநகரில் பெரும் அதிர்ச்சியை ஏற்படுத்தியது.
கண்காணிப்பு கேமரா (CCTV) காட்சிகள் மற்றும் செல்போன் சிக்னல்களை அடிப்படையாகக் கொண்டு விசாரணை நடத்திய போலீசார், இந்தச் சம்பவத்தில் ஈடுபட்டது 25 வயது யூடியூபர் நிஷாந்த் என்பதைக் கண்டறிந்தனர். இதையடுத்து, அவரைப் பிடிக்க 9 தனிப்படைகள் அமைக்கப்பட்டு தீவிர தேடுதல் வேட்டை நடத்தப்பட்டது.

குடும்பத்தினர் மற்றும் தோழி கைது:
தலைமறைவாக இருந்த நிஷாந்திற்கு உடந்தையாக இருந்ததாகவும், கொள்ளையடிக்கப்பட்ட நகைகளைப் பதுக்கி வைக்க உதவியதாகவும் கூறி, நிஷாந்தின் தந்தை சுரேஷ் மற்றும் அவரது தோழியான இன்ஸ்டாகிராம் பிரபலம் மீனாட்சி ஆகியோரை போலீசார் ஏற்கனவே கைது செய்தனர். அவர்களிடமிருந்து முதற்கட்டமாக சுமார் 5.5 கிலோ நகைகள் மீட்கப்பட்ட நிலையில், இருவரும் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர்.

நிஷாந்த் கைது மற்றும் 100% நகைகள் மீட்பு:
இதற்கிடையே, தனிப்படை போலீசாருக்குப் போக்கு காட்டி வந்த நிஷாந்த், தர்மபுரி மாவட்டம் சேஷம்பட்டி அருகே அரசுப் பேருந்தில் தப்பிச் செல்ல முயன்றார். சந்தேகமடைந்த பேருந்து ஓட்டுநர் கொடுத்த ரகசியத் தகவலின் அடிப்படையில், தனிப்படை போலீசார் பேருந்தை மடக்கி நிஷாந்தை அதிரடியாகக் கைது செய்தனர்.
மதுரைக்கு அழைத்து வரப்பட்ட நிஷாந்திடம் போலீசார் நடத்திய கிடுக்கிப்பிடி விசாரணையில், கொள்ளையடிக்கப்பட்ட மீதமுள்ள நகைகளை மதுரை விளாச்சேரி அருகே உள்ள கோபாலபுரம் மலை அடிவாரப் பகுதியில் பதுக்கி வைத்திருப்பதாக அவர் வாக்குமூலம் அளித்தார்.

இதையடுத்து, நிஷாந்தை நேரில் அழைத்துச் சென்ற போலீசார், அங்கு மறைத்து வைக்கப்பட்டிருந்த 6.2 கிலோ தங்கம் மற்றும் வைர நகைகளை மீட்டனர். இதன் மூலம், கொள்ளையடிக்கப்பட்ட சுமார் ரூ.15 கோடி மதிப்பிலான 11.7 கிலோ நகைகளும் 100 சதவீதம் முழுமையாக மீட்கப்பட்டு, நகைக்கடை நிர்வாகிகள் முன்னிலையில் எடைபோட்டு உறுதி செய்யப்பட்டுள்ளன.

நீதிமன்றக் காவலும் பரபரப்புப் பேட்டியும்:
இதனைத் தொடர்ந்து, கைது செய்யப்பட்ட நிஷாந்த் நேற்று (வியாழக்கிழமை) நீதிமன்றத்தில் ஆஜர்படுத்தப்பட்டு, ஒருநாள் நீதிமன்றக் காவலில் வைக்கப்பட்டிருந்தார். இந்நிலையில், இன்று (வெள்ளிக்கிழமை) மருத்துவப் பரிசோதனைக்குப் பின்னர் அவர் மீண்டும் மதுரை நீதிமன்றத்தில் ஆஜர்படுத்தப்பட்டார்.

அப்போது, அவரை நீதிமன்றக் காவலில் சிறைக்கு அழைத்துச் சென்றபோது, போலீஸ் வாகனத்தில் இருந்தவாறே செய்தியாளர்களைப் பார்த்துப் பேசிய நிஷாந்த், “இந்தக் கொள்ளைச் சம்பவத்திற்கும் மீனாட்சிக்கும் எந்த சம்பந்தமும் இல்லை” என்று பரபரப்புத் தகவலைத் தெரிவித்துள்ளார்.
ஏற்கனவே இந்த வழக்கில் மீனாட்சி கைது செய்யப்பட்டு சிறையில் அடைக்கப்பட்டுள்ள நிலையில், முக்கியக் குற்றவாளியான நிஷாந்த் இவ்வாறு கூறியிருப்பது வழக்கில் புதிய கோணத்தையும் பரபரப்பையும் ஏற்படுத்தியுள்ளது.